Հարցազրույց Զվարթնոց միջազգային օդանավակայանի Օդանավերի Փրկարարական և հակահրդեհային բաժնի համակարգող՝ Էմմա Գեւորգյանի հետ:

Հարցազրույցը վարեց Գյումրի ինֆոտան
մեդիագրագիտության ուսանող Յունեմա Խաչատրյանը

-Բարև Ձեզ:

-Բարև Ձեզ:

-Խնդրում եմ մի փոքր պատմեք Ձեր մասին:

-Ես Էմմա Գևորգյանն եմ:  Աշխատում եմ << Զվարթնոց >> միջազգային  օդանավակայանում՝  որպես  Օդանավերի  Փրկարարական և  Հակահրդեհային  բաժնի  համակարգող:

-Ի՞նչը առիթ  հանդիսացավ, որ աշխատեք օդանավակայանում:

-Օդանավակայանում աշխատանքի եմ անցել ռադիոյով աշխատանքային հայտարարության

հետքերով գնալու արդյունքում:

-Ո՞րն է  Ձեր  ամենամեծ  մասնագիտական  նվաճումը:

Օդանավակայանում մասնագիտական նվաճում եմ համարում անընդհատ զարգացում  ապրող օդանավերի փրկարարական և հրդեհաշիջման ոլորտի մասին ձեռք բերածս գիտելիքները,  որոնք մշտապես  թարմացման կարիք ունեն, որովհետև անմիջապես կապված են ավիացիոն արդյունաբերության հետ, որը մշտապես զարգացող  և մեր  ոլորտի  համար մարտահրավերներ և պահանջներ ներկայացնող արդյունաբերություն է:

Հետևաբար՝ մեր ոլորտում լճացումը բացառվում է:

Ի՞նչ  բարեփոխումներ  են  եղել  և սպասվում:

Ամենակարևոր բարեփոխումը ժամանակի մարտահրավերներին և պահանջներին  համահունչ գնալն է: Բարեփոխումների անհրաժեշտությունը պայմանավորված է ոլորտի զարգացմամբ և դրանից բխող պահանջարկով: Մեծ ուղևորահոսքը պահանջում է ավելի մեծ օդանավերի շահագործում, ինչն էլ իր հետ բերում է նոր մարտահրավերներ և պահանջում պատրաստվածության համապատասխան և առավել բարձր մակարդակ, քանի որ հրշեջ-փրկարարական ծառայության գերակա և առաջնային նպատակը կյանքեր փրկելն է:

Եվ  ի՞նչ  բարեփոխումներ  դուք  կցանկանայք,  որ  լիներ  Ձեր  ոլորտում:

Կուզենայի ապագայի օդանավերը, որոնց տարբերակներն արդեն իսկ շրջանառվում են համացանցում, հնարավորինս շուտ մուտք գործեն մեր իրականություն: Մի փոքր մանրամասնեմ՝ ըստ նախագծի վթարի դեպքում ուղևորասրահը առանձնանում է օդանավի մյուս կառուցվածքային մասերից և օդապարիկի օգնությամբ վայրէջք կատարում թե՛ ցամաքի, թե՛ ջրի վրա: Նման պարագյում՝ մարդկային կորուստները կլինեն անհամեմատ քիչ: Իսկ ներկայի համար ուզում եմ հետ չմնալ զարգացումներից և միշտ բարձր պահել  պատրաստվածության նշաձողը:

Օդանավակայանի  հրշեջ  մեքենաները  նմա՞ն  են  մյուս  հրշեջ  մեքենաներին,  թե՞  տարբերվում  են  ձևով  և  կառուցվածքով:

Օդանավակայանի  հրշեջ  մեքենաները  թե՛ կառուցվածքով, թե՛ տեխնիկատակտիկական տվյալներով  զգալիորեն  տարբերվում են այլ հրշեջ մեքենաներից:  Անգամ այդ մեքենաների անվանումը՝ օդանավերի հրշեջ - փրկարարական ավտոմեքենա, վկայում է դրանց առանձնահատկության մասին: Օրինակ՝  օդանավերի  հրշեջ – փրկարարական  ավտոմեքենան  մեծ արագություն է զարգացնում  հաշված  վարկյանների  ընթացքում,  պոմպը  շատ  հզոր  է  և  ունի  մեծ արտադրողականություն, փոխադրում է  հրդեհաշեջ նյութերի մեծ պաշար, և  այլն:

Ինչքա՞ն  է  օդանավակայանի  հրշեջ  մեքենայի  տարողությունը:

Օդանավերի հրշեջ - փրկարարական ավտոմեքենաների  հրդեհաշեջ նյութերի  բաքերի  տարողությունները  կարող են տարբեր  լինել՝  կախված  օդանավակայանի  դասակարգից, որով էլ պայմանավորվում է օդանավերի հրշեջ-փրկարարական ավտոմեքենայի մոդելի ընտրությունը:  << Զվարթնոց >>  օդանավակայանի  ՕՓՀ  ( Օդանավակայանի  Փրկարարական  Հակահրդեհային )  բաժնի յուրաքանչյուր  հրշեջ-փրկարարական  ավտոմեքենայի  միայն  ջրի  բաքի  տարողությունը 3000 գալոն / 11.356 լ  է, հրշեջ  պոմպի  թողունակությունը՝ 125 լ /վ: << Զվարթնոց >>  օդանավակայանի  հրշեջ փրկարարական ավտոմեքենաներն համալրված են նաև այլ հրդեհաշեջ նյութերի՝ փրփրարար և չոր քիմիկատային հրդեհաշեջ նյութ, միջազգային պահանջներին համապատասխան տարողունակությամբ բաքերովև հրդեհաշիջման համակարգերով:

Քանի՞  հրշեջ  մեքենա  ունի  ծառայությունը:

Զվարթնոց  օդանավակայանի   ՕՓՀ  բաժին ունի  3 օդանավերի  հրշեջ – փրկարարական ավտոմեքենաներ,  Շիրակ  օդանավակայանը  2՝  ըստ  օդանավակայանների  դասակարգերի:

Եթե  դեպք  լինի,  ինչքա՞ն  ժամանակում  է  հրշեջ  մեքենան  հասնում  դեպքի  վայր:

Համաձայն  Քաղաքացիական  Ավիացիայի  Միջազգային  Կազմակերպության  (ՔԱՄԿ [ԻԿԱՕ])  պահանջների՝ հրշեջ  ավտոմեքենաները  պետք  է  հասնեն  դեպքի  վայր և  ապահովեն  օդանավակայանի  դասակարգի  համար  պահանջվող հրդեհաշեջ նյութերի  50 %  օգտագործումը  մինչև  3  րոպե  ժամանակահատվածում: Այս պահանջի չափորոշիչներով էլ պայմանավորված են օդանավակայանի հրշեջ-փրկարարական ավտոմեքենայի համար ներկայացվող տակտիկատեխնիկական, տարուղունակության և արտդրողականության, արագընթացության, դժվարանցանելի ճանապարհ հաղթահարելու, ընացքից հրդեհաշեջ նյութ մատակարարելու և այլ պահանջները:

Գյումրու  հրշեջ  ծառայությունը  Ձե՞ր  ենթակայության  տակ  է:

Գյումրու  Շիրակ  օդանավակայանի  ՕՓՀ  ծառայությունը  նույնպես  << Արմենիա >>  Միջազգային  Օդանավակայաններ  ՓԲԸ  մաս է կազմում:

Գյումրու  օդանավակայանը   ունի՞  նոր  հրշեջ  մեքենաներ:

Շիրակ  օդանավակայանի  ՕՓՀ  ծառայությունը  վերջերս  համալրվել  է  օդանավերի  հրշեջ – փրկարարական  ժամանակակից  1 ավտոմեքենայով:

Շնորհակալություն հարցազրույցի համար: