Մշակութային ինտեգրում. արցախցի ու գյումրեցի պատանիները միասին բացահայտում են Գյումրին ու գյումրեցուն

 «Շատ ուսուցողական ներկայացում էր,-ասաց Սերգեյը ու շարունակեց,-չնայած շատ բաներն այս ամենից ես գիտեի. թե կյանքում ինչպես պետք է վարվել, ինչ չպետք է անել, բայց չգիտեի, որ նման գործ կա (ի նկատի ունի Վարդան Այգեկցու առակները)»:

Ապրիլի 3-ին Գյումրու դրամատիկական թատրոնի դահլիճը լեփ-լեցուն էր հանդիսատեսով: Ընթանում էր Վարդան Այգեկցու առակների մոտիվների հիման վրա ստեղծված «Հիմարներն ու խելոքները» խրատապատում բեմականացումը՝  հետաքրքիր բեմադրաոճով, ազգային երգ-երաժշտությամբ, յուրօրինակ ասելիքով:

Գյումրի ինֆոտունը ՀաՄաՏեղ ծրագրի շրջանակներում ներկայացման տոմսեր էր ձեռք բերել ու հրավիրել Գյումրու թիվ 1 գիշերօթիկ հաստատությունում ապաստանած արցախցի երեխաների ու պատանիների: Սերգեյը գիշերօթիկ հաստատության սաներից մեկն է, ով սիրով հյուրընկալել ու ընկերացել է արցախցի տղաների հետ: Պատանիները բեմականացման ամբողջ ընթացքում հետևեցին մեծ բավականությամբ, հետաքրքությամբ ու ծիծաղով, իսկ ներկայացման ավարտին դերասաններին դիմավորեցին ինքնաբուխ հոտնկայս բուռն ծափահարություններով:

Ներկայացման ավարտից հետո մասնակիցները Գյումրի ինֆոտան անդամների ուղեկցությամբ շրջեցին Գյումրու կենտրոնական հատվածով, քայլեցին դեպի Շիրազի տուն-թանգարան, որը, ցավոք, Covid-19-ի պատճառով այցելուների առաջ փակ էր, ապա այցելեցին Գյումրու Յոթ վերք եկեղեցի: Իսկ վերջում օրն ամփոփվեց համեղ հյուրասիրությամբ:

Նյութը պատրաստեց Գյումրի ինֆոտան անդամ Հասմիկ Համբարձումյանը