Դեմ ենք հոսանքի թանկացմանը

Հունիսի 23-ի առավոտյան ժամը 06:50 –ին զգալի թվով ոստիկաններ հարձակվել են Գյումրու Թատերական հրապարակում խաղաղ նստացույց անող երիտասարդների վրա և բռնի, առանց որևէ պահանջ ներկայացնելու, նրանց ոստիկանական մեքենաներով տեղափոխել Գյումրու ոստիկանության «Կումայրի» բաժին: Բերման ենթարկվածները 13-ն են՝ Կարեն Պետրոսյան, Վարդան Եղիազարյան, Տիգրան Պետրոսյան, Կարեն Ավագյան, Վոլոդյա Խաչատրյան, Արմեն Ներսիսյան, Մերուժան Պետրոսյան, Մամիկոն Վարդերեսյան, Գագիկ Մխիթարյան, Հայկ Խառատյան, Հայկ Բարսեղյան, Միշա Պողոսյան,Հովհաննես Չախալյան: Բաժնի մոտ հավաքվել էին նրանց հարազատները, ընկերները, ակտիվ քաղաքացիները՝ խաղաղ ցուցարարների ազատության պահանջով:

ՀՀ Ոստիկանության «Կումայրի» բաժնից ազատ են արձակվել բերման ենթարկված բոլոր 13 քաղաքացիները: Հարուցվել է քրեական գործ՝ խուլիգանության հատկանիշներով: Բերման ենթարկվածներից միայն մեկը՝ Կարեն Պետրոսյանն է դիտարկվում որպես կասկածյալ, իսկ մյուսները՝ որպես գործով վկաներ:

Հանրային ծառայությունները կարգավորող հանձնաժողովը հունիսի 17-ին որոշում է ընդունել էլեկտրաէներգիայի սակագնի վերանայման մասին: «Հայաստանի էլեկտրական ցանցեր» ընկերությունը դիմել էր Հանրային ծառայությունները կարգավորող հանձնաժողով՝ հոսանքի սակագինը բարձրացնելու համար:

ՀԷՑ-ն առաջարկել էր 1 կՎտ-ի սակագինը բարձրացնել մինչև 58 և 48 դրամ՝ գիշերվա և ցերեկվա համար: Հանրային ծառայությունները կարգավորող հանձնաժողովն իր ուսումնասիրությունների արդյունքում հիմնավոր համարեց 6.93 դրամով թանկացումը:

Ինֆոտնային հանդիպում

«Եթե դուք կարողանաք ստեղծել «Մարդամեջ» ակումբ, ապա պետք է քննարկեք ու այնպիսի գաղափարներ առաջ բերեք, որոնք կունենան երկար կյանք: Կան այնպիսի գործողություններ, որ դուք կարող եք անել առանց գումարի: Դուք պետք է ձեր համայնքում կատարեք բարեփոխումներ, դուք պետք է մասնակից լինեք այդ ռեֆորմներին: Դուք պետք է այնպես անեք, որ ձեր կյանքը փոխվի»,- այս խոսքերով  Մանանա Ասլամազյանը («Ինթերնյուս») դիմեց երիտասարդներին:

Այսօր Գյումրի Ինֆոտանը  տեղի ունենցավ «Մեդիան քաղաքացիների տեղեկացված մասնակցության համար» ծրագրի առաջին աշխատանքային հանդիպումը: 
Հանդիպման ընթացքում Վարուժան Ավանեսյանը ներկաներին ներկայացրեց ծրագրի խնդիրները, հետագա քայլերն ու անելիքները: Խոսվեց մեդիա ոլորտի, մեդիա ստեղծողների և մեդիա սպառողների խնդիրների ու դժվարությունների, համայնքային խնդիրների և դրանց լուծման ուղիների, ինչպես նաև մեդիայի դերի մասին: 

Գյումրի Ինֆոտան ծրագրի առաջին, տեղեկատվական հանդիպումը, որի ժամանակ
առավել մանրամասն ներկայացվեց առաջիկա մեկ տարվա կտրվածքով պլանավորված հիմնական գործողությունները, որոնց թվում` 

1. Սոցիալ-նորարարական՝  ակումբի ստեղծում,
2. Երկու «Մարդամեջ» սոցիալ-նորարարական միջոցառումների իրականացում,
3. Մեդիա գրագիտության դասընթացներ տարբեր տարիքային խմբերի ներկայացուցիչների համար /բլոգ, ֆեյսբուք, յութուբ, ֆոտոլրագրություն,.../,
4. Մրցույթներ տեսական գիտելիքները գործնականում կիրառելու և ամրապնդելու համար /բլոգի հոդված, ֆեյսբուքի գրառում, լավագույն ֆոտո և վիդեո.../,
5. Քաղաքացիական լրագրություն,
6. Մեդիա ոլորտի հայտնի փորձագետների հետ հանդիպումների և դասընթացների կազմակերպում,
7. Հանրային տարբեր միջոցառումներ,
8. Ֆիլմերի դիտում-քննարկումներ,
9. Ֆլեշմոբերի, մրցույթների, ցուցահանդեսների կազմակերպում...

      Հանդիպմանը ներկա էին ԱՄՆ ՄԶԳ-ից՝ Արև Մովսիսյանը, Ինթերնյուս-ից՝ Մանանա Ասլամազյանը, ՄՆԿ-ից` Արեն Մանուկյանը, Գյումրու ՔՀԿ ներկայացուցիչներ, աշակերտներ, ուսանողներ, ակտիվիստներ: Մեդիան քաղաքացիների տեղեկացված մասնակցության համար ծրագիրը համատեղ իրականացնում են  Մեդիա նախաձեռնությունների կենտրոնը, Եվրասիա համագործակցություն հիմնադրամը և Ինտերնյուսը ԱՄՆ Միջազգային զարգացման գործակալության ֆինանսավորմամբ։

Հանդիպում Գյումրի Ինֆոտանը

Հարգելի երիտասարդներ,

Հունիսի 9-ին ժամը 12:00 Գյումրի Ինֆոտանը (Մ.Մկրտչյան 38ա, 1բն)   տեղի կունենա ծրագրի առաջին, տեղեկատվական հանդիպումը, որի ժամանակ առավել մանրամասն կներկայացվեն առաջիկա մեկ տարվա կտրվածքով պլանավորված հիմնական գործողությունները, որոնց թվում` 

1. սոցիալ-նորարարական ակումբի ստեղծում,
2. թվով 2 "Մարդամեջ" սոցիալ-նորարարական միջոցառումների իրականացում,
3. դասընթացներ տարբեր տարիքային խմբերի ներկայացուցիչների համար նոր մեդիա գործիքների տիրապետման և մեդիա գրագիտության թեմաներով /բլոգ, ֆեյսբուք, յութուբ, ֆոտոլրագրություն,.../,
4. մրցույթներ տեսական գիտելիքները գործնականում կիրառելու և ամրապնդելու համար /բլոգի հոդված, ֆեյսբուքի գրառում, լավագույն ֆոտո և վիդեո,.../,
5. քաղաքացիական լրագրությամբ հետաքրքրված քաղաքացիների ակումբի ստեղծում,
6. մեդիա ոլորտի հայտնի փորձագետների հետ հանդիպումների և դասընթացների կազմակերպում,
7. հանրային տարբեր միջոցառումներ,
8. ֆիլմերի դիտում-քննարկումներ,
9. ֆլեշմոբերի, մրցույթների, ցուցահանդեսների կազմակերպում....

 

Գյումրու գարնանային առաջնություն

Մայիսի 24-ին տեղի ունեցան «Ի՞նչ, ե՞րբ, որտե՞ղ» ինտելեկտուալ խաղի Գյումրու գարնանային առաջնության՝ դպրոցական, երիտասարդական եւ բարձրագույն լիգաների մրցաշարերը: Առաջնությունն իր հարկի տակ էր հյուրընկալել Գյումրու թիվ 37 դպրոցը:

Բարձրագույն լիգայում հայտավորված թիմերն էին՝ «Խորան Արդ», «PoliTex» , «Սենատորներ», «Կաիսսա», երիտասարդական լիգայում՝ «ԳԵՆՏ», «Ֆորտունա», «Joker», «ՆԵՈ», «No-Name», «Ninjas in Pijamas», «Անի», դպրոցական լիգայում՝ «Ծիր կաթին»,«Բինգո», «Ֆոտոն», «Կոսմոս» եւ երկու նորաստեղծ թիմեր՝ «Էնիգմա» եւ «Խորանարդիկ»:

Գարնանային առաջնության կազմակերպիչն էր «Խորան Արդ» ինտելեկտուալ կենտրոնը: Առաջնությունն ընթացավ 3 փուլով, յուրաքանչյուր փուլում հնչեց 12 հարց: Հարցերի փաթեթի հեղինակն էր «Խորան Արդ» ինտելեկտուալ կենտրոնի նախագահ Սեյրան Մարտիրոսյանը: Գարնանային առաջնության դպրոցականների լիգայի հաղթող ճանաչվեց «Ֆոտոն» թիմը («Ֆոտոն» վարժարան), երկրորդ եւ երրորդ տեղերը համապատասխանաբար զբաղեցրեցին «Բինգո» (թիվ 2 ավագ դպրոց) եւ «Ծիր կաթին» (թիվ 3 ավագ դպրոց) թիմերը:

Գարնանային առաջնության երիտասարդական լիգայի հաղթող ճանաչվեց «Joker» թիմը, երկրորդ եւ երրորդ տեղերը զբաղեցրեցին «Նեո» եւ «Ninjas in Pijamas» թիմերը:

Գարնանային առաջնության բարձրագույն լիգայի հաղթող ճանաչվեց «Խորան Արդ» թիմը, երկրորդ եւ երրորդ տեղերը համապատասխանաբար զբաղեցրեցին «PoliTex» եւ «Սենատորներ» թիմերը:

«Joker» թիմի անդամներից Արթուր Չարչօղլյանը ֆեյսբուքյան իր էջում գրում է. «Մեկ ու կես տարի առաջ ոչ ոք չէր հավատում, որ մեր թիմն ունի ապագա, բայց մենք դարձանք մեկ ընտանիք, եւ դա արդեն իսկ հպարտության առիթ է: Շնորհակալություն կազմկոմիտեին լավ կազմակերպած խաղի եւ բարձր մակարդակի հարցերի համար»:

Մասնակից բոլոր թիմերը ստացան համապատասխան վկայագրեր:

Ի դեպ, «Խորան Արդ» ինտելեկտուալ կենտրոնը, որպես «Ակումբների միջազգային ասոցիացիայի» անդամ, իսկ այդպիսիք Հայաստանում երեքն են, 2015թ-ի ամռանը Գյումրում հյուրընկալելու է «Ի՞նչ, որտե՞ղ, ե՞րբ» խաղի Հայաստանի առաջնությունը:

«Ի՞նչ, որտե՞ղ, ե՞րբ» խաղի «Top 10» համբուրգյան հաշիվ ամփոփիչ մրցաշար Գյումրիում

Մարտի 29-ին Գյումրու թիվ 37 ավագ դպրոցում  տեղի ունեցավ Գյումրու 2014 թվականի «Ի՞նչ, որտե՞ղ, ե՞րբ» խաղի «Top 10» համբուրգյան հաշիվ ամփոփիչ մրցաշարը:

Մրցաշարի կազմակերպիչն էր «Խորան Արդ» ինտելեկտուալ հասարակական կազմակերպությունը: 

Մրցաշարին մասնակցության հայտ էին ներկայացրել 10 թիմ, սակայն ինտելեկտուալ ուղեղամարտում իրենց ուժերը չափեցին 9 թիմ՝ 6 մեծահասակների («Սենատորներ», «Խորան Արդ», «Պոլիտեխ»,«Կաիսսա», «Joker», «ԳԵՆՏ»)  և 3 դպրոցականների («Ֆոտոն», «Փյունիկ», «Բինգո»):

Մրցաշարի նպատակն էր ազնիվ մրցակցության պայմաններում որոշել լավագույնին:

Մրցաշարն անցկացվեց 2 փուլով, յուրաքանչյուրի ընթացքում  հնչեց 16 հարց: Հարցերը սովորականից ավելի բարդ էին, բայց համապատասխան՝ համբուրգյան հաշվով ուժեղագույնին  որոշելու համար:

Մրցաշարը  վարում էր  «Խորան Արդ» ինտելեկտուալ կենտրոն հասարակական կազմակերպության նախագահ Սեյրան Մարտիրոսյանը:

Լարված պայքարի արդյունքում, հավաքելով 14 միավոր, առաջատար ճանաչվեց «Joker» երիտասարդական թիմը, երկրորդ տեղը 11 միավորով զբաղեցրեց «Սենատորներ» վետերանների թիմը, իսկ երրորդ տեղը 7 միավորով զբաղեցրեց «Խորան Արդ» թիմը:

Կանչ համայնքի դպրոցում իրականացվեց փոքր դրամաշնորհային ծրագիր

«Հայաստանում կրոնական և ազգային փոքրամասնություների երեխաների իրավունքների պաշտպանություն» ծրագրի շրջանակներում կազմակերպված «Երբեմն բոլորս ենք փոքրամասնություն» խորագրով հանդիպումից հետո որոշվեց իրակնացնել փոքրիկ ծրագիր Արագածոտնի մարզի Կանչ եզդիական գյուղում: 

Գյուղը գտնվում է Թալինի տարածաշրջանում, Թալին քաղաքից 12-13 կմ արեւմուտք: Մարզկենտրոնից գտնվում է 61 կմ հեռավորության վրա: Նախկինում ունեցել է Գյալդո, Գյալթա, Գյալթո Մեծ, Կյալդո անվանումները: Գյուղի շրջակայքում է գտնվում Գյալթո փոքր ավերակ գյուղը:Գյուղն ընկած է Արտենի լեռան արեւմտյան՝ մասնատված ռելիեֆով լանջին: Գյուղը գտնվում է ծովի մակարդակից 1470 մ բարձրության վրա: 

Կլիման չափավոր ցամաքային է, աչքի է ընկնում ցամաքայնությամբ: Ամառները տաք են եւ չոր, ձմեռները` ցուրտ, ամեն տարի հաստատվում է կայուն ձնածածկույթ: Հունվարյան միջին ջերմաստիճանը տատանվում է -5--6-սահմաններում, հուլիսյանը` 22-24-ի սահմաններում: Մթնոլորտային տարեկան տեղումների քանակը՝ 350-400մմ: Բնական լանդշաֆտները չոր տափաստաններն են:Գյուղը հիմնականում քրդաբնակ է: 1873 թ-ին ունեցել է 91, 1897թ-ին` 142, 1926 թ-ին` 184, 1939 թ-ին` 437, 1959 թ-ին` 398, 1979 թ-ին` 378 քուրդ բնակիչ: Համայնքի բնակչությունը կազմում է 112 մարդ, որից 47% տղամարդիկ են, իսկ կանայք` 53%: Մինչ աշխատունակ տարիքի բնակչությունը կազմում է 28%, աշխատունակ տարիքի ներկայացուցիչները` 64%, հետաշխատունակները` 8%: Գյուղն ունի 33 տնտեսություն: Ունի դպրոց, կապի հանգույց: Համայնքի տնտեսության մասնագիտացման ուղղությունը գյուղատնտեսությունն է: Գյուղատնտեսական հողահանդակների հիմնական մասն օգտագործվում է որպես վարելահողեր, խոտհարքեր: Զբաղվում են բանջարաբոստանային, հացահատիկային, կերային կուլտուրաների մշակությամբ: Տնամերձ հողակտորներում կան բազմամյա տնկարկներ: Պահուստային հողերը զբաղեցնում են համայնքի մակերեսի 85%, որոնց մեջ 1041հա կազմում են արոտավայրերը, 49հա` վարելահողերը: Գյուղատնտեսական համախառն բերքի մեծ մասը բաժին է ընկնում ոչխարաբուծությանը: Զբաղվում են նաեւ խոշոր եղջերավոր անասնաբուծությամբ:Արդյունաբերություն չունի:Համայնքի հիմնախնդիրների մեջ կարեւորվում է դպրոցի շենքի, գյուղամիջյան ճանապարհների վերանորոգումը: Գյուղն ունի 22 աշակերտից բաղկացած դպրոց:

«Հայաստանում կրոնական և ազգային փոքրամասնությունների երեխաների իրավունքների պաշտպանություն» ծրագիրն իրականացվում է Եվրոպայի խորհրդի ֆինանսավորմամբ Համաշխարհային երիտասարդական անկախ միություն ՀԿ-ի և Եվրասիա համագործակցություն հիմնադրամի կողմից։ Եվրոպայի խորհրդի կողմից իրականացված «Կրոնական և ազգային փոքրամասնությունների երեխաների իրավունքների պաշտպանության» իրավիճակային վերլուծությունը ցույց տվեց, որ հանրային դպրոցներում, հատկապես համայնքներում փոքրամասնության ներկայացուցիչները ենթարկվում են տարատեսակ խտրականության դրսևորումների, որոնք հաճախ հանգեցնում են նրանց սոցիալական մեկուսացվածության։ 

Սույն ծրագրի նպատակն է խթանել երեխաների իրավունքները, հանդուրժողականության և բազմազանության մթնոլորտը և նվազեցնել ատելության և խտրականության դրսևորումները՝ հենվելով մարդու իրավունքների համընդհանուր դրույթների վրա։