Մարդու իրավունքների ոլորտներին վերաբերվող հանդիպում-քննարկումների շարքը Սախարովի կենտրոնի Գյումրի ինֆոտանը շարունակվում են

Այս անգամ Սախարովի կենտրոնի Շիրակի մասնաճյուղի գրասենյակում կազմակերպվել էր հանդիպում-քննարկում «Աշխատանքային իրավահարաբերություններ. Նոր զարգացումներ» թեմայով:

Հանդիպման սկզբում Սախարովի կենտրոնի իրավաբան Վիկտորիա Եղոյանի կողմից ներկայացվեցին 2020թ-ից ուժի մեջ մտած որոշ փոփոխությունները: Մասնավորապես, 2020թ. հունվարի 1-ից նվազագույն աշխատավարձը 68 000 դրամ է կամ հաշվարկայինը՝ 92 618 դրամ։

2020թ․ հունվարի 1-ից գործավարձով և ժամավճարով վարձատրվող աշխատակիցների համար ժամային տարիֆային դրույքի նվազագույն չափերը՝

1) աշխատաժամանակի նորմալ տևողության դեպքում (40-ժամյա աշխատանքային շաբաթ)՝ 406 դրամ

2) աշխատաժամանակի կրճատ տևողության դեպքում (36-ժամյա աշխատանքային շաբաթ)՝ 454 դրամ

3) աշխատաժամանակի կրճատ տևողության դեպքում (24-ժամյա աշխատանքային շաբաթ)՝ 680 դրամ:

Եկամտային հարկը՝ 23 տոկոս՝ առանց սանդղակի, սոց. վճարը՝ 2.5 տոկոս, 1 000 դրամները նույնն են մնում, նվազագույն աշխատավարձը դառնալու է 68 000 դրամ կամ հաշվարկայինը՝ 92 618 դրամ:

Ընդունել ի գիտություն, որ ելնելով 68 000 դրամից՝ հաշվարկային աշխատավարձի նվազագույն թիվը կկազմի 2020թ.-ի հաշվով 92 618 դրամ, ճշգրիտ թիվը 92617.45 է:

Երևան քաղաքում գործունեություն ծավալող 10 և ավելի աշխատող ունեցող գործատուն պետք է աշխատավարձի վճարումները կատարի անկանխիկ եղանակով:

2020թ. հունվարի 1-ից եկամտային հարկը 23 տոկոս է լինելու բոլորի համար, այսինքն՝ դուրս են գալիս 150 000 և 2 000 000 հասկացությունները, սոց. վճարը 2.5 տոկոս է մնալու, հաջորդ՝ 2021թ.-ից յուրաքանչյուր տարի կավելանա 1 տոկոսով, մինչև հասնի 5 տոկոս, ինչպես առաջ էր, դրոշմանիշային վճարը մնում է նույնը, նվազագույն աշխատավարձը առձեռն 68 000 դրամ է լինելու: Ինչպես նաև 10 և ավելի աշխատող ունեցող ընկերությունները պետք է աշխատավարձի վճարումները կատարեն բանկով: Իսկ միկրոձեռնարկատիրության համակարգի յուրաքանչյուր աշխատողի համար կվճարվի 5 000 դրամ եկամտային հարկ, սոց. վճարը և դրոշմանիշային վճարը մնում են նույն ձևով:

Ի սկզբանե ենթադրվում էր նվազագույն աշխատավարձը 55-ից հասցնել 63 հազար դրամի։ Սակայն քննարկումմներից հետո կառավարությունում եկան որոշման ավելացնել այդ գումարը։

Հանդիպմանը մեջբերվեց ՀՀ աշխատանքի և սոցիալական հարցերի փոխնախարար Գեմոֆին Գասպարյանի պարզաբանումը. «Մենք 4 մեթոդով իրականացրել ենք հետազոտությունը և ունենք արդյունքները: Կիրառվել է սոցիալ-ներառական նվազագույն աշխատավարձի մեթոդը, որն ասում է, որ Հայաստանում, որպեսզի միջին աշխատողների թվով և միջին անդամների թվով ընտանիքը գտնվի աղքատության ստորին, միջին և վերին գծերից վերև, պետք է նվազագույն աշխատավարձը լինի 67 հազար 660 դրամ․․․ Մենք․․․ վերցրել ենք նվազագույն աշխատավարձի միջին թիվ՝ 68 հազար դրամ»:

Քննարկվեցին նաև գործատու-աշխատող աշխատանքային հարաբերություններին վերաբերվող հարցեր, իսկ Գյումրու զբաղվածության տարածքային կենտրոնի տնօրեն Ամալյա Ադամյանը ներկայացրեց ընթացքի մեջ գտնվող մի շարք պետական ծրագրերը, մասնավորապես, «Մինչև երեխայի 2 տարին լրանալը, երեխայի խնամքն աշխատանքին զուգահեռ կազմակերպելու համար», «Աշխատաշուկայում անմրցունակ և մասնագիտություն չունեցող մայրերի համար», «Նորացված ծրագիր` տեսողության խնդիրներ ունեցող անձանց համար», «Գործազուրկների և աշխատանքից ազատման ռիսկ ունեցող աշխատանք փնտրող անձանց մասնագիտական ուսուցման կազմակերպում», «Գործատուին աշխատավարձի մասնակի փոխհատուցման և հաշմանդամություն ունեցող անձին ուղեկցողի համար դրամական օգնության տրամադրում» և այլն:

Հանդիպմանը մասնակցում էին գործատուներ, տնտեսագետ-փորձագետներ, հաշվապահներ, իրավաբաններ, ՔՀԿ ներկայացուցիչներ:

Իրազեկման առումով մասնակիցներին տրամադրվեցին էլեկտրոնային և տպագիր հուշաթերթեր` նշված փոփոխությունների վերաբերյալ: