Շիրակի մարզում կոռուպցիոն հիմնական խնդիրներն ու դրսևորումներն առողջապահական ոլորտում

Հարցազրույց  Շիրակի մարզպետի օգնական Անի Մաղաքյանի հետ

-Կոռուպցիան ի՞նչ ձևերով ու տեսակներով է առավել շատ արտահայտվում առողջապահական հաստատություններում:

-Իմ կարծիքով ՀՀ բոլոր մարզերում ու համայնքներում կոռուպցիան հիմնականում նույն ձևերով է հանդես գալիս` կաշառք դրամի, նվերի կամ ինչպես մենք ենք սիրում ասել լավության տեսքով: Շիրակի մարզում կոռուպցիան հստակորեն չունի իր տեսակները, և որևէ առանձնահատկություն այդ առումով չի էլ նկատվել: Գործում են նույն մեխանիզմները ինչ-որ ՀՀ ամբողջ տարածքում:

-Կոռուպցիոն գործոններն ինչպե՞ս կարող են անդրադառնալ առողջապահական ոլորտի վրա:

-Յուրաքանչյուր համակարգի  վրա էլ ազդում են կոռուպցիոն գործոնները և անպայմանորեն դրանք ունենում են իրենց բացասական ազդեցությունը ոլորտի գործունեության, աշխատակազմի աշխատունակության, ընդհանուր համակարգի վրա:Այդ գործոնները կարող են լինել կանոնների և նորմերի ոչ արդյունավետ կատարումը, ղեկավարությունն առանց զսպումների ու հաշվետվության մեխանիզմների:Սակայն վստահ եմ, որ առողջապահական ոլորտում կոռուպցիոն գործոններ չկան, որոնք էլ կարող են խաթարել աշխատանքային գործընթացը, և այդ դեպքում ոլորտն ու հաստատությունը չեն կարողանա լիարժեքորեն կատարել իրենց առջև դրված խնդիրներն ու պարտականությունները և չեն զարգանա:

Համայնքի առողջապահական ոլորտում որո՞նք են կոռուպցիայի հիմնական պատճառները:

-Շիրակի մարզում կոռուպցիայի հիմնական պատճառ կարող է հանդիսանալ հետսովետական մշակույթը, որը մենք ժառանգություն ենք ստացել Սովետական Միությունից` իր իսկ արատավոր սովորույթներով ու բարքերով: Գլոբալ պատճառ կարող է լինել ազգային մենտալիտետը, երբ մենք «շնորհակալություն» ասվածը հայտնել գումարի տեսքով կամ այլ ճանապարհով:

-Արդյո՞ք Գյումրիում կազմակերպվում են հակակոռուպցիոն միջոցառումներ`առողջապահական ոլորտը կոռուպցիոն ռիսկերից զերծ պահելու համար:

-Որպես մարզպետարանի ներկայացուցիչ կարող եմ ասել, որ իր լիազորությունների շրջանակներում ձեռնարկում է համապատասխան քայլերը, որ առողջապահական ոլորտի մեջ մտնող հաստատությունները գործեն օրենքի սահմաններում: Իսկ հակառուպցիոն միջոցառումներ կազմակերպվում են հասարակական կազմակերպությունների կողմից`սեմինարների, դասընթացների, ծրագրերի տեսքով: Նշենք նաև, որ Գյումրիում գործող հասարակական կազմակերպությունները գործում են ակտիվորեն և նմանատիպ միջոցառումներ մեր համայնքում պարբերաբար կազմակերպվում են:

-Ինչպիսի՞ վերահսկողություն է սահմանվում Գյումրիի հիվանդանոցներում` կոռուպցիոն քայլերը կանխելու նպատակով:

-Մարզպետարանի կողմից ձեռնարկվող քայլերն ուղղված են հիվանդանոցների և այլ առողջապահական հաստատությունների վերահսկողական մեխանիզմների ուժեղացմանը և ոլորտում բոլոր գործընթացներն օրենքին համապատասխանեցմանը:

-Ինչպե՞ս եք գնահատում հանրային մտածողության մակարդակը, վերջին երկու տարիների ընթացքում փոխվել է հասարակության կողմից կաշառքով կամ զանգով հարց լուծելու մշակույթը:

-Իմ անձնական կարծիքն այն է, որ հատկապես վերջին երկու տարիներին նկատվում են դրական տեղաշարժեր մտածողության մակարդակում և համոզված եմ, որ ամեն ինչ ինքնանպատակ չէ ու մտածողութան նման փոփոխությունն ակներև կդառնա հասարակության մեջ, կունենանք կայուն ու ավելի զարգացած հասարակություն: Վերջապես կունենանք թե՛ տնտեսապես, թե՛ մշակութային կայուն, թե՛ մտքով կայուն հասարակություն:

-Ի՞նչ առաջարկություններ ունեք դուք կոռուպցիոն դաշտն ավելի կայուն դարձնելու համար:

-Հանպատրաստից դժվար է տալ առաջարկներ, սակայն մարզում բոլոր համակարգերը պետք է աշխատեն հնարավորինս ճիշտ, բարեխիղճ, անսխալ, և նշեմ, որ առաջին հերթին ցանկացած անհատից է գալիս կոռուպցիայի բացառման գործընթացը սկսելը, և յուրաքանչյուր քաղաքացի պետք է ունենա հստակ գիտակցական համակարգ, որն էլ կօգնի առողջ հասարակության ձևավորմանը:

Հարցազրուցավար՝
Լիլիթ Մեսելյան, Գյումրի ինֆոտան մեդիագրագիտության դասընթացների շրջանավարտ (2020)

Ծանուցում*
Հոդվածում արտահայտված մտքերը և վերլուծությունները կարող են չհամըկնել Գյումրի ինֆոտան, Սախարովի կենտրոնի պաշտոնական դիրքորոշումների և տեսակետների հետ:

Լուսանկարը՝ Անի Մաղաքյանի ֆեյսբուքյան էջից: